ന്യൂഡൽഹി:​ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് നിർമ്മിക്കുന്ന ദൃശ്യങ്ങൾക്കും സിന്തറ്റിക് ഉള്ളടക്കങ്ങൾക്കും കർശന നിയന്ത്രണമേർപ്പെടുത്തിക്കൊണ്ട് 2021-ലെ ഐടി നിയമങ്ങളിൽ കേന്ദ്ര സർക്കാർ നിർണ്ണായക ഭേദഗതികൾ വരുത്തി. ഡീപ് ഫേക്കുകൾ, വ്യാജ വ്യക്തിത്വങ്ങൾ സൃഷ്ടിക്കൽ, സിന്തറ്റിക് മീഡിയയുടെ ദുരുപയോഗം എന്നിവ തടയാൻ ലക്ഷ്യമിട്ടാണ് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം ഈ പുതിയ വിജ്ഞാപനം പുറപ്പെടുവിച്ചിരിക്കുന്നത്പുതിയ നിയമങ്ങൾ ഫെബ്രുവരി 20 മുതൽ രാജ്യത്ത് പ്രാബല്യത്തിൽ വരും.

​പുതിയ നിയമപ്രകാരം "സിന്തറ്റിക്കായി നിർമ്മിക്കപ്പെട്ട വിവരങ്ങൾ" എന്നതിന് വ്യക്തമായ നിർവ്വചനം ആദ്യമായി നൽകിയിട്ടുണ്ട്. അൽഗോരിതങ്ങളോ സാങ്കേതിക വിദ്യകളോ ഉപയോഗിച്ച് സൃഷ്ടിച്ചതോ മാറ്റം വരുത്തിയതോ ആയ ഓഡിയോ, വീഡിയോ ദൃശ്യങ്ങൾ ഇതിൽ ഉൾപ്പെടും. ഇത്തരം ഉള്ളടക്കങ്ങൾ നിർമ്മിക്കുന്നതോ പങ്കുവെക്കുന്നതോ ആയ പ്ലാറ്റ്‌ഫോമുകൾ അവ എഐ ഉപയോഗിച്ച് നിർമ്മിച്ചതാണെന്ന് വ്യക്തമാക്കുന്ന ലേബലുകൾ നിർബന്ധമായും നൽകണം. വീഡിയോകളിൽ സ്ക്രീനിൽ കാണാവുന്ന തരത്തിലുള്ള ലേബലുകളും ഓഡിയോകളിൽ പ്ലേ ചെയ്യുന്നതിന് മുൻപുള്ള അറിയിപ്പുകളും നിർബന്ധമാണ്. കൂടാതെ, ഈ ഉള്ളടക്കം എവിടെ നിന്ന് ഉറവെടുത്തു എന്ന് കണ്ടെത്താൻ സഹായിക്കുന്ന മെറ്റാഡാറ്റ വിവരങ്ങളും ഡിജിറ്റൽ അടയാളങ്ങളും ഇതിൽ ഉൾപ്പെടുത്തിയിരിക്കണം.

​നിയമവിരുദ്ധമായ ഉള്ളടക്കങ്ങൾ നീക്കം ചെയ്യുന്നതിനുള്ള സമയപരിധിയിൽ വലിയ കുറവാണ് സർക്കാർ വരുത്തിയിരിക്കുന്നത്. നേരത്തെ 36 മണിക്കൂർ സമയം അനുവദിച്ചിരുന്ന സ്ഥാനത്ത്, ഇനിമുതൽ ഔദ്യോഗിക നിർദ്ദേശം ലഭിച്ചാൽ വെറും 3 മണിക്കൂറിനുള്ളിൽ അത്തരം പോസ്റ്റുകൾ പ്ലാറ്റ്‌ഫോമുകളിൽ നിന്ന് നീക്കം ചെയ്യണം. കുട്ടികൾക്കെതിരെയുള്ള അതിക്രമങ്ങൾ, അശ്ലീലദൃശ്യങ്ങൾ, വ്യാജരേഖകൾ, സ്ഫോടകവസ്തുക്കളുമായി ബന്ധപ്പെട്ട വിവരങ്ങൾ എന്നിവ തടയാൻ കമ്പനികൾ പ്രത്യേകം സാങ്കേതിക സംവിധാനങ്ങൾ ഏർപ്പെടുത്തേണ്ടതുണ്ട്.

​സോഷ്യൽ മീഡിയയിൽ ഉള്ളടക്കം പോസ്റ്റ് ചെയ്യുന്നവർ അത് എഐ ഉപയോഗിച്ച് നിർമ്മിച്ചതാണോ എന്ന് വെളിപ്പെടുത്തുന്ന സാക്ഷ്യപത്രം നൽകണം. നിയമം ലംഘിക്കുന്നവരുടെ വിവരങ്ങൾ നിയമപാലകർക്ക് കൈമാറാനും അക്കൗണ്ടുകൾ സസ്പെൻഡ് ചെയ്യാനും പ്ലാറ്റ്‌ഫോമുകൾക്ക് അധികാരമുണ്ടാകും. ഈ ചട്ടങ്ങൾ പാലിക്കാത്ത കമ്പനികൾക്ക് ഐടി നിയമപ്രകാരം ലഭിച്ചിരുന്ന നിയമപരിരക്ഷ (Safe Harbour Protection) നഷ്ടമാകും. ഇതോടെ പ്ലാറ്റ്‌ഫോമിലെ നിയമവിരുദ്ധമായ ഉള്ളടക്കങ്ങൾക്ക് കമ്പനി നേരിട്ട് നിയമനടപടികൾ നേരിടേണ്ടി വരും.